Axier Jaka Partaidetza zinegotziak, Amaia Agirreolea Udaleko Partaidetza zuzendariak eta 50 hiritarrez osatutako Gizarte Eztabaida Taldearen ordezkariek Demokrazia Zuzenaren araudia garatzeko oinarrizko dokumentua aurkeztu dute gaur goizean.
Helburua datorren abendurako Donostiak Herri Galdeketak arautuak izatea da. “Donostiak herri galdeketak egiteko araudia akordiotik osatu nahi dugu, alderdi guztien artean, eta herri eragileekin batera”, azaldu du Axier Jakak. Partaidetza Zinegotziak azpimarratu duenez, “herritarrei galdetzea eta herritarrek erabakietan parte hartzea normaltasun osoz eta iraunkorki egitea da helburua.”
Alderdien arteko debatea eta proposamen definitiboa
Gizarte Eztabaidako Taldeak eta Udal Gobernuak aurkeztu duten dokumentua Udalean ordezkatutako alderdi guztien artean eztabaidatuko dute. Horrekin batera, Donostiako herritar eta eragileek osatutako Kontraste Taldea sortu da. Kontraste talde honek bermatuko du herritarren parte hartzea eta jarraipena egingo dio alderdien arteko eztabaidari. Eztabaida horretatik, proposamen definitiboa aterako da eta Udal Gobernuak aurreratu du herri galdeketak egiteko araudia abenduko Udalbatzarrean onartzea aurreikusten duela.
Dokumentuaren oinarrizko elementuak
Araudia egiteko oinarri hartuko duten dokumentuak hainbat ezaugarri zehazten ditu: galdeketak udal eskumenei dagozkionak izango direla, eta udal eskumenak izan gabe ere Donostiari nabarmen eragiten dieten gaien aurrean udalerriak hartu beharreko posizioaren ingurukoak ere, esaterako. Bestalde, galdeketaren eragileak hiru izan daitezkeela zehazten du: Udala bera, herritarrak edo araudiak derrigorrezkotzat jotzen dituen gaietan egin beharrekoak.
Galdeketaren eremuak hiri osoa edo auzoak izan daitezke. Herritarrek sustatutako galdeketetan, hiri mailakoak badira, 18 urtetik gorako biztanleen % 4k eskatu beharko ditu, eta auzo mailakoak badira, auzo horretako % 8ak.
Miramarreko jardunaldietatik, Gizarte Eztabaida taldera
2013ko urrian Miramar Jauregian Demokrazia Zuzenaren inguruan egindako jardunaldietan, Juan Karlos Izagirre alkateak Udal Gobernuaren Demokrazia Zuzenaren inguruko ponentzia aurkeztu zuen, 150 herritar, eragile eta ordezkari instituzionalen aurrean. Ponentzia hartan galdera hau egiten zen: Beharrezkoa da Donostian Demokrazia Zuzenerako mekanismoak garatzea hiria denon artean eraikitzeko?
Aurtengo maiatzean, Udalak gizarte eztabaida prozesua jarri zuen abian, Donostiarako Demokrazia Zuzeneko eredua era kolektiboan eraikitzeko. Eztabaida horretan, 50 donostiar eta eragilek hartu dute parte, Gizarte eztabaida horren lanaren fruitua da gaur aurkeztu duten dokumentua.
Urriaren 1ean 19:00etan Miramarren
Axier Jakak deialdia egin die herritar guztiei dokumentuaren aurkezpen publikoan parte hartzera. Aurkezpen hori Miramar Jauregian izango da, urriaren 1ean 19:00etan.
iruzkinik ez:
Argitaratu iruzkina