Danbor martxarekin batera egitarau zabala antolatu dute
maiatzaren azken astebururako EH 11 Kolorek, Gipuzkoako erregio etxeek,
Parte Zaharreko ostalariek, Donostiako Piratek, 2016 egitasmoak eta
Donostiako Udalak.
Aniztasunaren Asteburuan salgai izango dituzten pintxoak aurkeztu dituzte Parte Zaharreko ostalariek.(Argazkia: E. Zabala)
Donostia aukeratu du berriro ere Euskal Herria 11 Kolore
mugimenduak jaia eta aldarrikapena batzeko. Izan ere, aniztasuna
aldarrikatzeko iazko 11 Danbor Martxak izandako arrakasta dela eta,
aurten jaia errepikatzea erabaki dute. Oraingoan, ordea, jaia hiru
egunetakoa izango da, 11 Kolore Fest Aniztasunaren Asteburua
izenburupean. Hala, maiatzaren azken astebururako egitarau erakargarria
antolatu dute, Gipuzkoako erregio etxeen, Parte Zaharreko ostalarien,
2016 egitasmoaren, Donostiako Piraten eta Donostiako Udalaren parte
hartzearekin.
Euskal Herriko biztanleen jatorri aniztasunaren inguruan hausnartu
eta eztabaida sustatzeko asmoarekin jaio zen EH 11 Kolore. Hala,
aniztasun horrek euskal kulturari eta euskal gizarteari ekarriko dion
aberastasuna dute abiapuntu. Gizarte eragile nahiz erakunde ororen parte
hartzeari irekia dago jarduera eta maiatzeko azken asteburuan egingo
duten jaira gonbidatu dituzte herritar guztiak.
Danbor martxa izango da ekitaldi nagusia, iaz bezalaxe. Alderdi
Ederren danborrekin elkartuko dira maiatzaren 31n, eta txupina botako du
Javier Suarezek, Donostiako Errioxako Etxearen izenean. Hala,
Gipuzkoako erregio etxe zaharrenari omenaldi txiki bat egin nahi diote,
ehun urte bete berri baititu. Ondoren, Oreka TXak iaz propio sortutako Atanbora
kantua joko dute elkarrekin partaide guztiek. Donostiako Piraten
Burubeltz konpartsak animatuko du 11 Danbor Martxa, eta Erdialdeko
kalaeak zeharkatuko ditu. Alderdi Ederren bukatuko dute ibilbidea, eta
bertan, Lekeitioko Deabruen suzko ikuskizunaz gozatzeko aukera egongo
da.
Igandean, berriz, Gipuzkoako Errejio Etxeen XXIX. Eguna izango da,
Kostituzio plazan. Jai horrek ere 11 Kolore Festekin bat egingo du.
Hala, gastronomia produktu anitzak dastatzeko aukera egongo da, jarriko
dituzte zortzi postuetan. Gainera, Errioxa, Gaztela, Andaluzia,
Extremadura, Aragoi eta Galiziako folklore taldeek desfilea egingo dute
Erdialdeko kaleetan barrena, eta ondoren, emanaldiak eskainiko dituzte
Konstituzio plazan.
Bestetik, Parte Zaharreko ostalariei esker, pintxo bereziak
dastatzeko aukera egongo da Aniztasunaren Asteburuan, 11 Pintxo 11
Zapore jarduerari esker. Hala, larunbatean eta igandean Parte Zaharreko
hamaika tabernetan beste herrialde batzuetako sukaldaritzan
oinarritutako pintxoak egongo dira salgai: Txuleta (Txile), A fuego
negro (Mexiko), Aitona (Galizia)…
11 KOLORE FEST, EGITARAUA:
Maiatzak 30, ostirala
- 17:30-21:00. Kultur ekitaldiak eta haurrentzako tailerrak, Easo plazan.
Maiatzak 31, larunbata
- Sardina Freskue haurrentzako ikuskizuna, Bulebarrean.
- 17:30. 11 Danbor Martxa, Alderdi Ederren.
- 20:30. Lasarte Orioako Semblante Andaluz eta Tik-Tara talde zarauztarraren musika eusko kubatarra.
Ekainak 1, igandea
- 10:00. Errejioetako folklore taldeen desfilea. Alderdi Ederretik Konstituzio plazara.
- 11:30-14:30 eta 18:00-21:00. Folklore taldeen emanaldiak, Konstituzio plazan.
- Egun osoan zehar, zortzi txosna jarriko dituzte, eta bertan erregio
etxeetako gastronomia produktuak salgai egongo dira, Konstituzio plazan.
Salgai egongo diren pintxoak (Maiatzak 31 eta ekainak 1):
- TXULETA taberna. Enpanada txiletarra (Txile). Haragi xehetua, arraultza egosia, azeituna.
- A FUEGO NEGRO. Belarri eskabetxatua mole
izoztuarekin (Mexiko). basatxerri belarria, porrua, azenarioa, laurel
hostoa, gatza, eskabetxea, mole sorbetea.
- AITONA taberna. (Galizia). Olagarroa, piper gorria, piper berdea, tipula, arraultza, piperauts gozoa.
- ORMAZABAL taberna. (Katalunia). Piperra, alberjinia potxatua eta antxoa ogi txigortuaren gainean.
- HERRIA taberna. (Eskozia). Galeper arraultza eta garagi xehetua.
- BELFAST irish tavern. (Irlanda). Izokin keztatua, patara, pipermina, askotariko letxugak eta morroi piperra.
- REKALDE taberna. (Palestina). Letxuga, tomatea, alberjinia, falafela, jogurt saltsa eta menta.
- ZERUKO taberna. (Maroko). Kuskusa eta txipiroiak tintan.
- BORDABERRI. (Txina). Ahatea, lekak, wantuna, pontzu saltsa (soja eta zitrikoak), eta sagar purea.
- ORDIZIA taberna. (Kolonbia). Arto irin taloa lau gaztekin eta beste arto irina haragiarekin.
- EL QUINTO PINO. Eguberri (Errioxa). Arkume tripak errioxar erara prestaturiko patatekin.
Iturria: Irutxuloko hitza
