Arte Ederren eraikina. (Argazkia: Agurtzane Altuna)
Arte Ederren antzoki ohiaren eraistea saihestuko lukeen babes maila
eman dio Eusko Jaurlaritzak aipatutako eraikinari. Hain zuzen
ere, Monumentu gisa kalifikatutako Kultur Ondare izendatu du, udal
gobernuak eskatu bezala. Izan ere, Bilduk hurrengo udalbatzarrean
eztabaidatuko duten erakunde adierazpen bat erregistratu zuen duela egun
gutxi, Eusko Jaurlaritzari Arte Ederren eraikinari babes maila handiena
emateko eskatuz, hots, Monumentu gisa kalifikatutako Kultur Ondarea.
Jaurlaritzako teknikariek 2013ko ekainean egin zuten txostenaren
arabera, Arte Ederren eraikinak Monumentu gisa kalifikatutako Kultur
Ondare izendatzeko espedientea hasteko baldintzak betetzen zituen.
Urtebete geroago, Jaurlaritzak izendapen hori berretsi du.
Udal gobernua pozik agertu da erabakiarekin, eta Jaurlaritzak
“zentzuz” jokatu duela adierazi du. Hori bai, babesa bermatuko lukeen
dekretua egin dezan eskatu dio, oposizioak otsaileko udalbatzarrean
adostutakoarekin antzokia “eraistea posible litzatekeelako”. Hain
justu, otsailean Udalbatzak Eraikitako Hiri Ondarea Babesteko Plan
Berezi berria onartu zuen. Onarpen horren ondorioz, Udalbatzak, udal
gobernuaren irizpidearen kontra –kanpoko fatxadak eraistearen kontra
azaldu baita– gaur egun Arte Ederren eraikinak duen C babes maila ematea
adostu zuen. Horrek eraikinaren berreraikitzea ahalbidetzen du eta,
ondorioz, bertan egin nahi duten hotelari bide ematen dio.
Egoera aldatu da orain, Jaurlaritzaren izendapenarekin. Gasteizko
Gobernutik aurreratutakoaren arabera, jaurlaaritzak elkarrizketa prozesu
bat abian jarriko du hiriko eragile publiko eta pribatuekin,
eraikinaren etorkizuneko babesa eta erabilera bermatzeko.
Iturria: Irutxuloko Hitza
iruzkinik ez:
Argitaratu iruzkina