Udalak lantalde berri bat eratu du antenen ordenantza berri bat egiteko

Udalak lantalde bat osatu du gaur goizean, telekomunikazio-sareei dagozkien instalazio erradioelektrikoak erregulatzeko ordenantza berria presta dezan. Talde politiko guztietako ordezkariz osatuta egongo da, eta indarrean dagoen ordenantza eguneratu beharko du, zaharkitua geratu baita. Egungo ordenantza 1999 urtekoa da eta estatuko Telekomunikazioen 11/1998 Lege Orokorrean oinarritzen da. Lege honek zentimetro koadroko 450 mikrowatt igortzea ahalbidetzen du, baina Europak zentimetro koadroko igorpen-mailak 0,1 mikrowattetik beherakoak izatea gomendatzen du.
Axier Jaka Ingurumeneko zinegotziak adierazi du gai honetan alderdi guztiak ados egotea garrantzitsua dela, telefonia mugikorreko antenen igorpenek gero eta kezka handiagoak sortzen dituztelako gizartean. Ildo horretatik, azaldu du joan den otsailean udal talde guztiek Europako Kontseiluaren Parlamentu Batzarraren 1815 ebazpenarekin bat egiteko adierazpen instituzionala onartu zutela aho batez: “Ebazpen horren arabera, arreta-printzipioa aplikatu behar dugu, ALARA printzipio moduan ezagutzen dena, As Low As Reasonably Achievable, hau da, lor daitekeen zentzuzko baliorik txikiena, eta hori egin nahi dugu ordenantza berria idaztean, prekauzio irizpideak ezarri, alegia».
Jakak azaldu duenez, orain arte egindako lanari jarraituz, gaur arratsaldean hiriko mapa erradioelektrikoari buruzko azterlana aurkeztuko dute publikoki. Agiri horren arabera, igorpen elektromagnetikoen mailek indarrean dagoen estatuko legedia betetzen duten arren, Europako Kontseiluak gomendatutakoak gainditzen dituzte nabarmen: “Arlo honetan egindako lehen azterketa da, eta araudia eguneratzeko abiapuntua izango da, eta, horrenbestez, osasun publikoaren alorrean prebentzio irizpideak errespetatzeko».
Neurketak ekainaren 4an, 5ean eta 6an egin zituzten, toki publikoetan gehien bat. Hirian orotara telefonia mugikorreko 146 antena identifikatu dira, eta neurtutako mailek indarrean dagoen estatuko legedia betetzen dutela hauteman da. Hala ere, askok Europako gomendio aurreratuenak gainditzen dituzte, toki batzuetan nabarmen. Neurtutako balioen artean 0,01 eta 2 microwatio o gehiago arteko potentzia dentsitateak jaso dira.
Arreta berezia eskola eta ospitalei
Azterlanaz arduratu den Raul de la Rosa lan prebentzioan adituak esan du antenen kontzentrazio handienak hirigunean eta Grosen daudela: «Arreta berezia jarri diegu kezkagarriagoak iruditzen zaizkigun inguruei, adibidez, ikastetxeei, haurtzaindegiei, ospitaleei edo egoitzei eta hiriguneko parkeei edota jolaslekuei, erradiazioaren aurrean ahulagoak diren herritarrak, umeak kasu, horietan biltzen baitira. Gehienak lurzoruan egin diren arren, neurketa batzuk antenetatik gertuago egin dira, igorpenen magnitudea handiagoa baita, batez ere, antenaren eta neurketa-puntuaren artean oztoporik ez badago». Azkenik, Raul de la Rosak gogorarazi du herrialde industrializatuetako herritarren % 5 inguru elektrohipersentikorrak direla.
Axier Jakak azaldu duenez, azterlaneko datuek argazki esanguratsu bat eman duten arren, garrantzitsuena lanean jarraitzea da ordenantza berria ahalik eta azkarren prestatzeko: “Udalak pauso irmoak eman nahi ditu udalerrian sortzen diren frekuentzia altuko eremu elektromagnetikoak kontrolatzeko, eta, besteren artean, arlo honetan egun udalaren lizentziarik ez duten antenak erregulatuko ditugu”.
Ikerketa Udalak eta Industria, Energia eta Turismo Ministerioak ematen dituen lizentzien datu-baseetan oinarriturik egin da. Gauzak horrela, udal lizentziarik ez duten zenbait antena daudela jakin da, eta orain, datuak alderatuko dituzte antena horiek identifikatzeko eta erregulatzeko

Iturria: Donostia Gaur